1990 թ. հունվարին Բաքվում տեղի ունեցած հայկական ջարդերի տարելիցի առթիվ

22 հունվարի, 2017

2017 թ. հունվարի 22-ին Բաթումի Սուրբ Փրկիչ եկեղեցում տեղի ունեցավ 1990թ. Բաքվում տեղի ունեցած հայկական ջարդերի 27-րդ տարելիցին նվիրված միջոցառում: Հիշատակի միջոցառմանը ներկա էին Բաթումիում ՀՀ գլխավոր հյուպատոս Եղիշե Սարգսյանը, ՀԱԵ Վիրահայոց թեմի Աջարիայի, Գուրիայի և Իմերեթիայի հոգևոր հովիվ Տեր Արարատ քահանա Գումբալյանը, հայկական համայնքային կազմակերպությունների ղեկավարները և ներկայացուցիչները:

Կիրակնօրյա պատարագի ավարտին, Արարատ քահանա Գումբալյանի մատուցմամբ կատարվեց հոգեհանգստյան կարգ՝ նվիրված Բաքվում տեղի ունեցած հայկական ջարդերի զոհերի հիշատակին:

Միջոցառմանը՝ անմեղ նահատակների հիշատակին և ոճրագործությունները դատապարտող խոսքով հանդես եկան Բաթումում ՀՀ գլխավոր հյուպատոս Եղիշե Սարգսյանը և Տեր Արարատ քահանա Գումբալյանը:

Դիմելով ներկաներին` Բաթումում ՀՀ գլխավոր հյուպատոսն անդրադարձավ 27-ամյա վաղեմության իրադարձություններին` ընդգծելով, որ Բաքվում հայ ազգաբնակչության կոտորածներն Ադրբեջանի կողմից, ի պատասան Լեռնային Ղարաբաղի ժողովրդի ինքնորոշման ձգտումների, Արցախում և Ադրբեջանի հայաբնակ վայրերում կազմակերպած և իրականացրած էթնիկ զտումների քաղաքականության փուլերից մեկն էր: Եղիշե Սարգսյանն ընդգծեց, որ տեղի ունեցած վայրագությունները և ագրեսիան պետք է համապատասխան գնահատականի և դատապարտման արժանան միջազգային հանրության կողմից:

Միջոցառման ավարտին ծաղիկներ զետեղվեցին Սուրբ Փրկիչ եկեղեցու բակում տեղակայված խաչքարի առջև:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր