Բաթումի “Սուրբ Փրկիչ” հայկական եկեղեցում նշվել է 1988 թ. Սպիտակի երկրաշարժի 25-րդ տարելիցը

08 դեկտեմբերի, 2013

Սույն թվի դեկտեմբերի 8-ին Բաթումի “Սուրբ Փրկիչ” հայկական եկեղեցում նշվել է 1988 թ. Սպիտակի երկրաշարժի 25-րդ տարելիցը:

Աջարահայության հոգևոր առաջնորդ Արարատ քահանա Գումբալյանի կողմից մատուցված պատարագից և երկրաշարժի անմեղ զոհերի ոգեկոչման կարգից հետո, ներկաների առջև ելույթ է ունեցել Բաթումի ավագանու /սաքրեբուլո/ ղեկավար Իրակլի Չավլեիշվիլին, որը կարեկցանքի խոսքեր ասելուց բացի ընդծել է, որ հայ ժողովրդի դժբախտությունը դա նաև բոլոր վրացիների դժբախտությունն է և իրենք միշտ կանգնած են մեր ժողովրդի կողքին: Այնուհետ ելույթ է ունեցել Բաթումում ՀՀ գլխավոր հյուպատոս Արամ Գրիգորյանը: Պատմելով 1988-ի արհավիրքի և նրա աղետալի հետևանքի մասին, հայ դիվանագետը կարևորել է ողջ աշխարհի անգնահատելի աջակցու-թյունը, շեշտելով, որ եղբայրական Վրաստանն առաջինն էր, որ օգնության ձեռք մեկնեց մեզ:

Գլխավոր հյուպատոսը նշել է, որ Վրաստանից և, մասնավորապես Աջարիայից, տասնյակ կամավորներ են մեկնել աղետի գոտի`փրկարարական ու վերականգնողական աշխատանք-ներին մասնակցելու համար և խոսքը տրամադրել է աջարահայ համայնքի “Մեր տունը Վրաստանն է” կազմակերպության ղեկավար Սահակ Տալիթյանին, որը պատմել է Լենինականում ու Սպիտակում իր և իր բաթումցի ընկերների տարած աշխատանքի, այն օրերին աղետի գոտում տիրող ահավոր իրավիճակի մասին:

Դրանից հետո, չնայած հորդառատ անձրևին, ներկաները, որոնց թվում եղել են Աջարիայի կառավարության աշխատակիցներ, Բաթումում հավատարմագրված դիվանագետներ, բաթումահայեր, ծաղկեպսակներ են զետեղել եկեղեցու բակում գտնվող խաչքարին, մեկ րոպե լռությամբ հարգելով ահավոր արհավիրքի անմեղ զոհերի հիշատակը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր