ՀՀ Լոռու մարզի պաշտոնական պատվիրակության այցը Աջարիայի ԻՀ

03 սեպտեմբերի, 2017

2017թ. սեպտեմբերի 3-ից 4-ը կայացել է ՀՀ Լոռու մարզի պաշտոնական պատվիրակության այցը Վրաստանի Աջարիայի Ինքնավար Հանրապետություն՝ մարզպետ Արթուր Նալբանդյանի գլխավորությամբ: Պատվիրակության կազմում էին Վանաձորի, Ալավերդու և Ախթալայի քաղաքային համայնքների ղեկավարներ Մամիկոն Ասլանյանը, Կարեն Փարեմուզյանը և Հայկազ Խաչիկյանը, մարզպետարանի զարգացման ծրագրերի և վերլուծության բաժնի պետ Հասմիկ Մկրտչյանը, տուրիզմի և մշակույթի հարցերով փորձագետ Անի Բաղդասարյանը, Վանաձորի համայնքապետարանի կրթության և մշակույթի բաժնի պետ Գոռ Բադյանը: Բաթումում պատվիրակությանը միացել է ՀՀ գլխավոր հյուպատոս Եղիշե Սարգսյանը: Այցը իրականացվել է Լոռու մարզի և Աջարիայի ԻՀ միջև ապակենտրոնացված համագործակցության մասին 2014 թ. ստորագրված պայմանագրի հիման վրա:

Հետագա համագործակցության հարցերի քննարկումների նպատակով պատվիրակությունը հանդիպումներ և զրույցներ է ունեցել Աջարիայի Ինքնավար Հանրապետության կառավարության նախագահ Զուրաբ Պատարաձեի, Գերագույն Խորհուրդի/խորհրդարան/ նախագահ Դավիդ Գաբաիձեի, Բաթումի քաղաքապետ Գիորգի Երմակովի, Քոբուլեթի համայնքի ղեկավար Սուլխան Եվգենիձեի, Աջարիայի ԻՀ մշակույթի, կրթության և սպորտի նախարար Ինգա Շամիլիշվիլիի, գյուղատնտեսության նախարարի պաշտոնակատար Ավտանդիլ Մեսխիձեի, Էկոնոմիկայի և ֆինանսների նախարարի տեղակալ Կոնստանտին Մեգրելիշվիլիի, Աջարիայի առևտրա-արդյունաբերական պալատի նախագահ Թամազ Շավաձեի հետ, կազմակերպվել է տնտեսական և զբոսաշրջային ոլորտների ներկայացուցիչների ընդլայնված երկկողմ հանդիպում և համագործակցության ոլորտների փոխադարձ ներկայացումներ, այցելություն գյուղատնտեսական փորձարարական կենտրոն:

Բոլոր մակարդակների հանդիպումներում և քննարկումներում կողմերն ընդգծել են հայ-վրացական համագործակցության շրջանակներում Լուռու մարզի ու Աջարիայի ԻՀ, ինչպես նաև Վանաձոր-Բաթում, Ալավերդի-Քոբուլեթ, Ախթալա-Չակվի, Սպիտակ-Խելվաչաուր բարեկամացած քաղաքների միջև ապակենտրոնացված կապերի իրականացմանն ուղղված կոնկրետ քայլերի և միջոցառումների ձեռնարկումը՝ տնտեսական, մշակութային, զբոսաշրջության, երիտասարդական շփումների ոլորտներում:

Պատվիրակությունն այցելել է ՀՀ գլխավոր հյուպատոսություն, Բաթումի Սուրբ Փրկիչ եկեղեցի, կայացել է հանդիպում հայ համայնքի ներկայացուցիչների հետ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր