Բաթումում ՀՀ գլխավոր հյուպատոս Ն.Մաթոսյանի հանդիպումը Ռուսթավելու անվան պետական համալսարանի նորանշանակ ռեկտոր Տ.Արոշիձեի հետ

26 փետրվարի, 2025

2025 թվականի փետրվարի 26-ին Բաթումում ՀՀ գլխավոր հյուպատոս Նարինե Մաթոսյանն այցելել է Բաթումի Ռուսթավելու անվան պետական համալսարան (այսուհետ՝ Համալսարան), որտեղ հանդիպել է Համալսարանի նորանշանակ ռեկտոր Տիտե Արոշիձեի հետ:

Տիտե Արոշիձեն Համալսարանի ռեկտոր է նշանակվել 2025 թվականի հունվարի 21-ին կայացած ընտրությունների արդյունքում: Մինչ այդ նա զբաղեցրել է Աջարիայի Ինքնավար Հանրապետության գյուղատնտեսության նախարարի, այնուհետև՝ Գերագույն խորհրդի փոխնախագահի պաշտոնները: Տ.Արոշիձեն «Վրացական երազանք» կուսակցության անդամ է:

Գլխավոր հյուպատոսը շնորհավորել է Արոշիձեին նոր պաշտոնում նշանակվելու կապակցությամբ: Կողմերն ընդգծել են հարևան և բարեկամ Հայաստանի և Վրաստանի հարուստ կրթական և մշակութային ժառանգությունը, ինչպես նաև երկու երկրների գիտակրթական կապերի զարգացման կարևորությունը։

Տ. Արոշիձեն ներկայացրել է Համալսարանի կրթական համակարգը, որը ներառում է բակալավրի, մագիստրատուրայի և դոկտորական կրթական ծրագրեր: Համալսարանում դասավանդում են միջազգային հարաբերություններ, տնտեսագիտություն, իրավագիտություն և այլ մասնագիտություններ:

Զրուցակիցները կարևորել են միջազգային համագործակցության հետագա զարգացման անհրաժեշտությունը: Այդ համատեքստում քննարկվել է Վանաձորի Հովհաննես Թումանյանի անվան պետական համալասարանի և Բաթումի Ռուսթավելու անվան պետական համալսարանի միջև համագործակցության մասին Փոխըմբռնման հուշագրի ստորագրման ծրագրված գործընթացը, որը նախատեսվում է ս.թ. մարտի 10-ին:

Զրուցակիցները նշել են, որ Փոխըմբռնման հուշագրի ստորագրումը կարևոր քայլ կլինի երկու համալսարանների միջև սերտ և ուղիղ համագործակցության խորացման ուղղությամբ: Այն հնարավորություն կտա իրականացնելու կրթական հաստատությունների ուսանողների և դասախոսական կազմի փոխանակման ծրագրեր:

Հանդիպմանը մասնակցել է Համալսարանի միջազգային կապերի և ռազմավարության զարգացման դեպարտամենտի պետ Մարինե Գիորգաձեն:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր