Գլխավոր հյուպատոսի Քոբուլեթ կատարած այցի վերաբերյալ

27 նոյեմբերի, 2025

2025 թվականի նոյեմբերի 25-ին Բաթումում ՀՀ գլխավոր հյուպատոս Նարինե Մաթոսյանը աշխատանքային այցով այցելեց Աջարիայի Ինքնավար Հանրապետության Քոբուլեթ քաղաք և հանդիպեց քաղաքապետ Իրակլի Ցեցխլաձեի ու մունիցիպալիտետի ավագանու նախագահ Իոսեբ Ժղենտիի հետ։

Գլխավոր հյուպատոսը շնորհավորեց նորանշանակ քաղաքապետին՝ պաշտոնը ստանձնելու կապակցությամբ և ընդգծեց Հայաստանի և Վրաստանի մարզերի ու քաղաքների միջև ապակենտրոնացված համագործակցության նշանակությունը՝ որպես հայ-վրացական հարաբերությունների զարգացման կարևոր ուղղություն։

Հանդիպման ընթացքում քննարկվեցին Քոբուլեթ և Ալավերդի քույր քաղաքների միջև համագործակցության ընդլայնման հնարավորությունները, այդ թվում՝ փողոցների անվանակոչման հարցը, զբոսաշրջության, կրթության և մշակույթի ոլորտներում համատեղ ծրագրերի իրականացումը, կրթական հաստատությունների միջև ուղղակի կապերի խորացումը և երիտասարդների շփումների ակտիվացումը։

Քաղաքապետ Իրակլի Ցեցխլաձեն ներկայացրեց Քոբուլեթի զբոսաշրջային ներուժը և իր տեսլականը՝ քաղաքը զարգացնելու որպես առողջարանային կենտրոն։ Նա ընդգծեց իր անձնական պատրաստակամությունն ու աջակցությունը Քոբուլեթի և Ալավերդու համագործակցությունը շարունակական զարգացման գործում։

Իոսեբ Ժղենտին ընդգծեց, որ Սև ծովի վրացական հանգստավայրերից ՀՀ քաղաքացիների համար ամենանախընտրելին Քոբուլեթն է, և հավելեց, որ քաղաքի իշխանությունների դրական վերաբերմունքը ևս մի հավելյալ խթան է այցելուների համար։ Նա անդրադարձավ նաև Քոբուլեթի հայ համայնքին՝ կարևորելով նրանց ակտիվ մասնակցությունըու դերակատարությունը տեղական հասարակական կյանքում:

Կողմերը պայմանավորվեցին շարունակել պարբերական հանդիպումները՝ համագործակցության ընթացքը համակարգելու և նոր նախաձեռնություններ քննարկելու նպատակով։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր